Narón é un concello que conta con historia propia, cunha identidade que o fai singular, e que nos une a todos os que nacemos, vivimos e convivimos en Narón. Somos unha realidade social emerxente. Proba diso é que nas últimas décadas témonos convertido no motor industrial da Terra de Trasancos, no mascarón de proa da diversificación económica desta comarca. Con máis de 37.000 habitantes, Narón é hoxe a cuarta cidade da provincia coruñesa, e o oitavo concello de Galicia, un dos municipios galegos que experimenta un maior crecemento poboacional.

Nos últimos vinte e cinco anos, Narón converteuse nun concello próspero, xerando emprego e riqueza para todos, xerando servizos e benestar para os nosos veciños e veciñas. Froito dese proceso de crecemento Narón transformouse nun concello acolledor, e por iso son moitas as novas familias que se asentan neste municipio para botar raíces aquí.

Narón é unha realidade diversa, conformada polo seu patrimonio natural e histórico, a súa paisaxe, a súa cultura, e sobre todo as súas xentes, a súa sociedade civil. Esa é a gran riqueza deste concello. Contamos con tódas as ferramentas necesarias para facer unha cidade nova e puxante, con parques empresariais, infraestruturas, zonas verdes e servizos, entre eles a futura administración electrónica.

Dende estas liñas quero aproveitar para saudar a todos os naroneses e naronesas, e comprometerme a seguir mellorando a calidade de vida dos nosos veciños e veciñas. Convídovos tamén a empregar todas as posibilidades que Internet ofrece, coma a nosa páxina web onde iremos ofrecendo toda a información de interese para os habitantes de Narón.

Recibide unha calorosa aperta.

José Manuel Blanco Suárez
Alcalde de Narón