Logo da consolidación de Narón coma referente na xestión cultural pública en Galicia, o Concello de Narón, xunto co seu Padroado da Cultura, vén de inaugurar o novo Pazo da Cultura. O segundo maior auditorio de Galicia servirá de espazo de acollida de grandes eventos culturais á vez que sede da Escola Profesional de Teatro de Narón e das escolas de baile, música e danza do Padroado de Cultura. Pero ademais é capaz de acoller a meirande parte da programación cultural que ata hoxe se celebraba no Auditorio Municipal de Narón, que xa quedou pequeno co devir dos anos.

A organización interna do novo Pazo da Cultura responde a un edificio cultural dividido en espazos destinados a usos distintos aínda que relacionados entre si, coma son o espazo dedicado á escola de música, danza e teatro, outro para albergar exposicións, un grande espazo que corresponde ao teatro e, finalmente, o lugar onde se desenvolve a escena e as estancias de ensaio e camerinos, ademais de almacéns e outras instalacións propias dunha infraestrutura cultural coma esta.

O edificio está distribuído por zonas, asignando á Planta Soto maquinaria e instalacións por un lado, e aulas e salas de ensaio por outro. Na Planta Escena atópanse os almacéns, obradoiros e escena. Nas plantas Baixa, Primeira e Segunda sitúanse a Escola (con obradoiros, salas, secretaría e arquivos na planta Baixa, salas de ensaio, almacéns, vestiarios na Planta Primeira e aulas na Planta Segunda), a zona de Exposicións, que se desenvolven na Planta Baixa, o Edificio do Teatro (co patio de butacas, palcos, dous anfiteatros e outras instalacións coma salas de control e aseos), e por último o espazo que ocupa a Escena (onde atopamos camerinos na Planta Baixa e Primeira, almacéns e controis na Planta Segunda) .

O Pazo da Cultura de Narón foi inaugurado oficialmente o pasado 13 de decembro de 2008, polo anterior alcalde de Narón, Xoán Gato Díaz.