|
Queridos e queridas pais e nais, coidadores, coidadoras, mestres e mestras,
O Servizo de Normalización Lingüística do Concello de Narón, dependente da Concellaría de Educación, lanza a campaña Do berce á rúa. Medra coa lingua.
Queremos darvos a coñecer esta iniciativa que ten como obxectivo promover o emprego da lingua galega de pais, nais, educadores e educadoras a nenos e nenas como
lingua de comunicación habitual.
A transmisión interxeracional do galego, tanto no ámbito familiar coma educativo é vital para conseguir que nenos e nenas acaden un coñecemento pleno desta
lingua e teñan o dereito e a oportunidade de empregala con total normalidade. Mediante esta campaña pretendemos concienciar a familias, coidadores/as e
mestres/as da importancia de empregar como lingua de comunicación cos nenos e nenas a lingua galega pois supón o coñecemento da nosa lingua propia, a creación
dun vínculo co seu contorno e un importante factor de identidade cultural, ademais de favorecer a adquisición de novas linguas.
Do berce á rúa. Medra coa lingua é un proxecto que consta dunha web na que podedes atopar diferentes recursos, tanto didácticos coma lúdicos, en lingua
galega. Mais a campaña pretende activar un proceso participativo entre nais, pais, educadoras e educadores co Servizo de Normalización Lingüística co fin de
elaborar recursos e materiais que faciliten a aprendizaxe da lingua galega por parte de nenas e nenos.
Neste inicio da campaña centrámonos na etapa de 0 a 3 anos aínda que posteriormente iremos ampliando esta marxe de idade.
Maria del Carmen Espada Cortizas
Concelleira de Educación de Narón
|
