Na andaina por calquera das rutas presentadas descubriremos máis de 200 puntos de interese, que van dende a igrexa románica de San Martiño de Xuvia no Couto ata o cemiterio prehistórico do Monte dos Niños, Sedes, con 17 mámoas catalogadas, pasando por castros, muíños, casas medievais, pazos, casas labregas, pontes, presas, ribeiras fluviais, árbores de máis de 300 anos de idade ou praias cara ó Atlántico coma Hortiña e Casal.

Agardamos que «Narón en nove itinerarios» sexa, cando menos, unha porta aberta á curiosidade polo que nos rodea. Convidámosvos pois a disfrutar e conserva-lo tesouro cultural e natural da nosa terra... a vella, pero sempre anovadora terra galiciana.